رواية بقلم الكاتبة ايمان شلبي

قدامك خمس بنات يابني اختار اللي تعجبك ومن بكره اجوزهالك 
وقف وربع أيده بغرور وهو بيبص علي كل واحده فينا بتقييم 
كنت واقفه بهز رجلي بعصبيه وانا ببصله بنظرات ناريه 
لف رأسه وهو بيسأل جدو بسخريه 
هما فين الخمسه دول ياجدي انا شايف اربعه بس !
جدو باستغراب 
سلامه النظر يابني قدامك خمس بنات ولاد عمك 

بص تحيتي وهو بيشاور عليا بسخريه اكبر 
اي ده هي دي بنت 
جزيت علي اسناني بغيظ 
ايه مش باين ولا ايه 
رد باستفزاز 
صراحه افتكرتك ولد في البدايه معلش اصل يعني مش متعود اشوف بنات بالشكل ده 
وماله بقي شكلي أن شاء الله 
بصلي من فوق لتحت بابتسامه بارده 
ولادي اوي يعني بصراحه شوفي الفرق ما بينك وما بين البنات اللي جنبك ده حماده وده حماده تاني خالص 
اخدت نفس طويل وانا بجز علي اسناني وبقول بهدوء احتراما لجدي 
يبقي اختارلك واحده منهم ومتصدعناش ياكابتن 
رد برفعه حاجب 
كابتن!
مردتش عليه ولفيت وشي النحيه التانيه وانا بنفخ بضيق وبقول بهمس 
مستفز 
جدو وهو بيحاول يلطف الجو وبيقول بهزار 
بس ياواد يا ياسين ملكش دعوه بقمر العيله 
رد بسخريه وهو بيشاور علي بنات عمي الاربعه 
قمر !!
اومال دول اي ياجدي 
نفخت بضيق وانا بقول بصوت مسموع 
اللهم طولك يارووووح 
واحده من بنات عمي وهي بتقول بدلع 
سيبك منها ياسينو هي ميان طول عمرها كده بتحب تتنكر في شخصيه الولاد 
بصيتلها بقرف 
سيبك منها ياسينو نينينينيي 
عامله نفسها هيفاء وهبي وهي في الحقيقه اما بتشيل الميك اب بتبقي عامله زي عبده السمكري اللى تحت بيتنا لا والله ده عبده احلي ! 
ياسين وهو بيبصلها بهدوء 
اسمك ايه 
هي بدلع 
دارين 
ياسين بقرف 
سردين في حد يسمي بنته سردين 
هي بغيظ 
نوووو دارين داااارين 
اه بقولك ايه يادارين الواحد برضو قبل ما ياخد البضاعه يحب يشوف ان كانت حقيقيه ولا مزيفه 
ردت باستغراب 
what مش فاهمه انت بتقول ايه 
ياسين بخبث 
يعني بصراحه انتي حلوه 
ردت بخجل 
اوووووه ثانكس 
ياسين ببرود 
بس انا عايز منك خدمه 
ردت بدلع 
اوكي اللي انت عايزه 
ياسين 
ياريت لو تروحي تغسلي وشك من الكيلو ميك اب اللي انتي حطاه ده عشان اشوف أن كنتي فعلا حلوه ولا لا !
حطيت ايدي علي بوقي وانا بضحك 
هههههههه هات الدكتور عشان يخيط 
فركت ايديها بتوتر 
هه ا انا 
ياسين 
معلش ياسردين يوه اقصد يادارين اصل الواحد مش عايز يتغش ولا انت ايه رأيك ياجدي!
جدو بتأيد 
حقك يا ياسين يابني روحي يادارين يابنتي امسحي الميك اب خلي ياسين يتطمن 
دارين بتوتر 
ا انا ا انا انا 
ياسين بتريقه 
انا مش عارفني انا توهت مني انا مش انا
دارين بغيظ 
اووووف هو ايه أصله ده انا مش عايزه اتجوز عن اذنكم 
قالت جملتها وطلعت تجري علي بيتها وهي بتدب رجلها في الأرض بعصبيه 
اما عني بصيتله وانا بقوله بجمود 
وبما اني شبه الولاد فلا يجوز تتجوز ابن عمك ياكابتن الناس تقول لا مؤاخذه الوان 
عن اذنك ياجدو أنا همشي 
قولت كلامي وخرجت انا كمان وطلعت علي بيتنا 
اول ما دخلت كانت ماما قاعده مستنيه بلفه 
ها عملتي ايه أختار مين ايه اللي حصل قالك ايه ق
قاطعتها بضيق 
اييييه في ايه سيبيلي فرصه ارد
هي بضيق 
سكتنا 
اتنهدت وانا بقعد علي الكنبه وبسحب تفاحه وباكلها 
معرفش لسه مختارش 
وبصيتلها 
بس الاكيد مش انا يعني ويبقي عمل فيا خير 
ومش انتي ليه ياختي!!
رديت بغيظ 
قال اي بيقول لجدي فين الخمسه انا مش شايف غير اربعه بس بيقولي افتكرتك ولد 
البعيد عديم النظر والاحساس 
لوت بوقها بسخريه 
عنده حق واحد عايش طول عمره برا في أمريكا وكل يوم بيشوف بنات اشكال والوان وكلهم حلوين حقه يشبهك بالولاد بمنظرك ده 
ماله بقي منظري أن شاء الله هو انا لازم البس محزق وملزق واحط كيلو ميك اب في وشي عشان اعجب !!
وبعدين احسن انا اصلا مكنتش موافقه علي الجوازه الهباب دي هو جدي مفكر أننا جواري عشان يبيع ويشتري فينا 
والتاني اللي مفكر نفسه السلطان محمد الفاتح ده كمان طبعا ماهو حقه ما هو جدي هو اللي عطاله الحق يتعوج علينا 
واقولك علي حاجه أنا هفضل كده بمنظري ده ومش هتغير عشان حد واللي عاجبه عاجبه واللي مش عاجبه يخبط دماغه في الحيط 
ماما بسخريه 
ماهو ده اللي فالحه فيه طوله لسانك 
رديت ببرود 
اهو علي الاقل فالحه في حاجه 
ماما
بعصبيه 
امشيي غوري من وشي 
اوووووف استغفر الله العظيم يارب 
منك لله يا شيخه
خليكي كده ياختي خليكي قاعده جنبي لحد ما تعنسي خالص فالحه بس تقوليلي لما اتجوز هعمل وهعمل وهعمل
ابقي قابليني لو حد بص